لهلا يوصلك لشي سبيطار..

لهلا يوصلك، سَوَل المجرب لا تْسال الطبيب. واللي فاتك بليلة راك عارف آش بغا يكوليك.
المهم لهلا يوصلك حيث إيلا وصلتي غير وجَدْ فلوسك. و ما تفكرش فالضرائب اللي تتخلص، راه كلشي تخوصص.
لهلا يوصلك، حيت فالمستعجلات خاصك تشد النوبة. ويلا بغيتي تزرب على جيبك ضْرَب. المهم نتا و جيبك، ونتا و ضَرَك.
لهلا يوصلك، خاصةََ بالليل و شدوك تنعس. راه ماكاين حد فالعنابر. القليل اللي تيصبر على نعاس الليل. والنعاس فيه و فيه. وهنا راه كاينين مواليه.
لهلا يوصلك كيما وصلت ليه مع با اللي تهرس فيديه، حيت التهراس ولى تجارة فالحديد. ماشي راه دايرين يديهوم مع محلات المعدات الطبية اللي قبالتهم.
لهلا يوصلك حيث راك غادي تخسرهم صْحاح فالصيدليات و تْما غادي تعرف شحال د الربح غَيْدِوْلِيك بلا حشمة. لو جاتك البكية غير بكي. الشكوى على ربي.
لهلا يوصلك، راه كاع اللي خدام تَمْ ناوي فيك الخير. غادي يبقى فيك الحال و حتى لو مابقاش فيك راك ملزوم. ماشي راه الرشوة وْلاتْ أجرة مجتمعية. باش تْحَيَدْها خاصك بنادم تْحَيْدُو.
لهلا يوصلك، إيلا كنتي قادر توصلو، أما لو كان بعيد عليك، لو قدرتي توصَلُو غير وْصَل. عنداك غير تحصل. و المرة الجاية اعرف فين تسكن.
و لهلا يوصلك لشي سبيطار، فكر فصحتك راها كنز، كنز اللي تيقلال ليك مع الوقت. كنز تيندم عليه كل من ضاع ليه و ناسينو كاع مواليه. وما تكونش حمار و تيق، راه ما كاينة صحة فالمغرب.

مشاركات القراء:

كاتب المقال: